Norðurlandakeppni (Nordic Winner) ungra sýnenda fer fram í Svíþjóð sunnudaginn 15. desember. Þar munu keppa landslið ungra sýnenda frá Noregi, Finnlandi, Danmörku og Íslandi. Landslið Íslands samanstendur af fjórum stigahæstu ungu sýnendum í eldri flokki og í ár eru það þær Eyrún Eva Guðjónsdóttir, Jóhanna Sól Ingadóttir, Kristín Ragna Finnsdóttir og Emilý Björk Kristjánsdóttir sem skipa landsliðið. Þjálfarar landsliðsins eru þær Rannveig Gauja Guðbjartsdóttir og Brynja Kristín Magnúsdóttir. Næstu daga munum við fá að kynnast þessum hæfileikaríku hundastelpum.

Eyrún Eva er stigahæsti ungi sýnandi ársins í eldri flokki og ásamt því að keppa með landsliðinu í Svíþjóð verður hún fulltrúi Íslands á Crufts – stærstu hundasýningu í heimi sem verður haldin í Birmingham, Bretlandi dagana 6.-9. mars 2025. 

Þriðja í röðinni er Jóhanna Sól, hún er annar stigahæsti ungi sýnandi ársins í eldri flokki og ásamt því að keppa með landsliðinu í Svíþjóð verður hún fulltrúi Íslands á Heimssýningunni sem verður haldin í Helsinki, Finnlandi dagana 8.-10 ágúst 2025. 

Önnur í röðinni er hún Kristín Ragna, hún er þriðji stigahæsti ungi sýnandi ársins í eldri flokki og ásamt því að keppa með landsliðinu í Svíþjóð verður hún fulltrúi Íslands á Evrópusýningunni sem verður haldin í Tékklandi dagana 10.-13. apríl 2025. 

Fyrst í röðinni er Emilý Björk, en hún er að ljúka fyrsta árinu sínu í eldri flokki með þeim frábæra árangri að vera fjórði stigahæsti ungi sýnandi ársins.  ​

​Forstjóri Icelandair, Bogi Nils Bogason, Ásdís Pétursdóttir, forstöðumaður samskipta og sjálfbærni og Sigurgeir Már Halldórsson forstöðumaður sölu- og markaðssviðs Icelandair Cargo tóku á móti fulltrúum HRFÍ.

„Við áttum ágætis samtal þar sem sjónarmiðum félagsmanna og miklum áhyggjum af ástandinu var komið til skila.  Forstjóri Icelandair, Bogi Nils Bogason, lagði áherslu á að ákvörðun um að kaupa ekki útbúnað í töskurými nýrra farþegavéla félagsins fyrir flutning gæludýra, hafi verið tekin með bæði hagkvæmni félagsins og minnkun kolefnisspors í huga, en búnaðurinn er þungur og kallar á aukna eldsneytisþörf vélanna“ sagði Erna Sigríður Ómarsdóttir, formaður félagsins eftir fundinn.

„Þessi ákvörðun setur okkur hundafólk hins vegar marga áratugi aftur í tímann, innflutningsferlið er nógu þungt, erfitt og dýrt fyrir. Að í ofanálag skapist algjör óvissa um flutningsmöguleika þessara fjölskyldumeðlima til landsins er grafalvarlegt mál. Félagsmenn eru ríflega 5.000 í dag og hverjum félagsmanni fylgir hópur, bæði fjölskylda og vinir, sem er annt um hundana. Icelandair hefur árum saman verið tenging okkar við umheiminn ef svo má segja, enda flug eini raunhæfi kosturinn við að flytja hunda til landsins. Staðan er mjög erfið, verði ekki fundinn einhver leið til að koma til móts við okkur hundaeigendur“, sagði Erna. ​Hún kvaðst hafa lagt áherslu á hversu íþyngjandi þessi ákvörðun væri og kallaði eftir áframhaldandi samtali til að skoða lausnir og nefndi þar nokkra möguleika. Hún vonaðist til að Icelandair endurskoðaði ákvörðun um algert bann við flutningi gæludýra í farþegavélum. „Nýjar vélar eru enn ekki komnar í gagnið að fullu og því ætti enn að gefast tími til að liðka til“, sagði Erna. 

​Ef ákvörðunin stendur óbreytt, verður einungis hægt að flytja gæludýr í cargo hjá Icelandair frá Liege flugvelli í Belgíu og JFK flugvelli í USA, sem er bæði kostnaðarsamt, óheppileg staðsetning og í flestum tilvikum ferðalag sem kallar á aukið álag á dýr og eigendur. Samkvæmt könnun félagsins leyfa SAS, Norwegian, Finnair og Austrian air enn bókun gæludýra í farþegaflug, en flugáætlun þeirra er mjög takmörkuð auk þess sem SAS er þjónustað af Icelandair og eru flugnúmer félaganna oft sameinuð í vélar Icelandair, sem flytja þá ekki hunda.

Enn önnur hindrun felst í því að samkvæmt reglum MAST þarf hundur að koma til landsins á dagvinnutíma dýralækna sem heilsufarsskoða hundana við komu þeirra til landsins. Það þýðir að þær fáu vélar sem mögulegar eru til flutnings, hvort sem um er að ræða cargo- eða aðrar vélar, verða að lenda á Keflavíkurflugvelli milli kl. 6 og 17 á þeim örfáum komudögum í mánuði þegar inntaka er í einangrunarstöðvar.

Í apríl síðastliðinn fékk MAST fram breytingu á reglugerð um innflutning hunda og katta sem meðal annars felur í sér að ekki er lengur heimilt að flytja gæludýr til landsins í farþegarými flugvéla, en áður var leyfilegt að ferðast þannig með hunda undir 8 kg. að þyngd, í búri sem komst undir farþegasæti. Að sögn MAST höfðu komið höfðu upp tilfelli þar sem farþegar gengu beint út með slík dýr en afhentu þau ekki til einangrunarvistar. Í stað þess að laga ferilinn, var sett algert bann við þeim möguleika.
​
„Eins slæm og þessi ákvörðun var fyrir okkur hundafólk, þá virðist kynning hennar, annað hvort frá MAST eða ISAVIA, hafa tekist svo illa gagnvart flugfélögum sem fljúga hingað til lands, að það ríkir útbreiddur misskilningur um að það sé bannað að fljúga með hunda í farþegavélum, hvort sem er í farþega- eða töskurými, til og frá landinu. Þetta þarf að minnsta kosti að leiðrétta, en allra helst að fá þennan möguleika inn aftur.”, segir Erna um afleiðingar reglugerðarbreytinganna.

Nú er komið að því að velja afrekshund ársins og þjónustuhund ársins og leitar nú Sámur eftir tilnefningum í samkeppnina.
Valið á afreks- og þjónustuhundum ársins verður í höndum kjósenda og hafa allir kost á að velja sína hunda. Heiðrun á afreks- og þjónustuhundum ársins fer fram á nóvember sýningu félagsins 23. - 24. nóvember 2024.  

Afrekshundur ársins
Þarf að uppfylla eitthvað af eftirfarandi:

• að hafa komið að björgun manna eða dýra,
• að hafa liðsinnt einstaklingum með fötlun eða veikindi,
• að hafa verið til uppörvunar og hjálpað á einn eða annan hátt.

 
Þjónustuhundur ársins
Þeir hundar sem vinna allan ársins hring að þjónustu í samfélaginu, t.d.:

• lögregluhundar,
• fíkniefnahundar,
• tollhundar,
• björgunarhundar,
• og aðrir sem vinna mikilvæg störf.

 
Með tilnefningunni þarf að fylgja frásögn um hundinn og hans störf.
Tilnefningar sendist á netfangið [email protected] fyrir 31. október 2024 þar sem fram koma upplýsingar um nafn hunds og aldur, nafn eiganda og sendanda.

Útlit og umhirða 
Golden retriever er í ýmsum blæbrigðum af rjómalit, gullnum eða gulum lit en ekki má hann vera rauður eða rauðleitur (mahogany). Leyfilegt er að þeir hafi fáein hvít hár á bringu. Hvítt afbrigði (í raun bara mjög fölur litur) nýtur mikilla vinsælda og er nú orðið samþykkt í retriever ræktun. Feldurinn á að vera sléttur eða liðaður og hafa þykkan undirfeld sem hrindir frá sér vatni. Ekki er mikil feldhirða hjá golden retriever hundum, þeir fara úr hárum en hægt er að halda því í skefjum með því að bursta reglulega í gegnum feldinn. Gott og vandað fóður hjálpar líka til við að minnka feldlos. Ekki er mikil þörf á sápuböðun. 
Golden retriever samsvarar sér vel í byggingu, er kröftugur en má þó ekki vera of grófur (klossaður). Hreyfingar eru léttar og frjálslegar. Ennislögun er breið og ennisbrún vel afmörkuð. Trýni er kröftugt. Augu dökk og augnsvipur vinalegur og mildur. Eyru meðalstór. Háls vel vöðvaður. Brjóstkassi djúpur og rúmur. Afturfótabeygjur (vinklar) djúpar. Hann má ekki bera skottið of hátt. Feldur sléttur eða liðaður og fætur eiga að skarta síðum feldi (fánum). 
Líftími þeirra er um 11-12 ár. ​

​Petit Basset Griffon Vendéen eða PBGV eiga uppruna sinn að rekja til Vendée svæðisins í vesturhluta Frakklands þar sem þeir hlupu um lausir yfir gróft landslag í samfloti með veiðimönnum og öðrum hundum í hóp þar sem þeir þefuðu uppi bráð; kanínur og önnur smádýr.  Hlutverk þeirra var að þefa uppi bráðina og reka hana úr felustað sínum svo veiðimaðurinn vopnaður skotvopni gæti veitt bráðina. Algengt er að hundarnir séu með hvíta týru í enda skottsins og gerði það veiðimönnunum auðveldara fyrir að koma auga á hundana þegar þeir voru á kafi í gróðri.

Tegundin er minnst af fjórum tegundum sem kennd eru við Vendéen, en hinar tegundirnar eru Grand Basset Griffon Vendéen, Briquet Griffon Vendéen og Grand Griffon Vendéen. Allar eru þessar hundategundir enn í dag vinsælustu veiðihundarnir í Frakklandi.
Í upphafi var sama ræktunarmarkmið fyrir Petit Basset Griffon Vendéen og Grand Basset Griffon Vendéen (GBGV)  þar sem eini munurinn á milli tegunda var hæð á herðakamb. Það var svo árið 1950 sem PBGV fékk sitt eigið ræktunarmarkmið, það var þó leyfilegt að para saman PBGV og GBGV til ársins 1977 en þá bannaði franska hundaræktarfélagið blöndun á milli tegundanna. 

Gelt er erfitt hljóð fyrir viðkvæm eyru mannfólksins og er oft talið einna neikvæðast við hundaeign, mögulega fyrir utan eða á pari við hundaeigendur sem ekki hirða upp eftir hundinn sinn. Stundum verður gelt að vandamáli en mikilvægt er að muna að gelt er einnig hljóðmerki, tjáning og fullkomlega eðlilegur hluti þess að vera hundur. Það er því hvorki skynsamlegt né sanngjarnt að gera það að markmiði að fá hundinn til að hætta alfarið að gelta. Það er ekki skynsamlegt vegna þess að þá tekur þú einn tjáningarmöguleika hundsins þíns í burtu og það er ekki sanngjarnt þar sem hundar gelta, kettir mjálma og hestar hneggja. 
 
Ekki örvænta því það er ýmislegt hægt að gera til að minnka gelt ef þörf er á. Í þessari grein ætlum við að skoða gelt og tegundir þess nánar og skoða jafnframt möguleika til að minnka gelt, ef þér finnst enn þá eftir lestur þessarar greinar ástæða til. ​

​Varðgelt getur heyrst þegar hundinum finnst hann þurfa að verja eitthvað sem hann telur að sé í hættu um að verði tekið af honum. Það getur líka heyrst þegar hundurinn ákveður að hann þurfi að verja sig og er það yfirleitt einungis ef hann er tilneyddur. Hundurinn upplifir ógn og lætur vita með varðgelti. Geltið er styttra og dýpra en hræðslugeltið. Hundurinn getur einnig urrað ásamt því að gelta og því er þessi tegund gelts oft túlkuð sem árásargirni. Það ber að athuga að varðgelt er í rótina hræðsla en ekki árásargirni og ber að höndla það á svipaðan hátt og hræðslugelt en þó allt eftir aðstæðum og hversu hræddur hundurinn er. Hafið í huga að hundur sem ætlar að verja sig eða sitt með árás í stað flótta, er öruggur með sig og er ekki líklegur til að eyða orku í að gelta.  

Margir hundaeigendur telja að það þurfi að kenna hundum að matur eða dót sem tilheyrir hundunum sé eitthvað sem fólk má taka frá þeim að vild. Því falla margir í þá gildru að reyna að kenna hundinum sínum þessa lexíu með því að taka af þeim matarskálina, bein eða leikföng í tíma og ótíma og refsa eða skamma fyrir það ef hundurinn lætur vita að þeim líkar ekki þessi leikur, t.d. með urri eða gelti. Hundurinn lærir þannig af eiganda sínum að hann þarf að verja lífsbjörgina sína, oft matinn með kjafti og klóm, því ef hann lætur vita að hann kunni ekki við að láta taka frá sér mikilvæga hluti og lífsnauðsynlega í tilfelli matar er hann skammaður. Í framhaldi passar hundurinn enn betur upp á matinn sinn og dótið. Þetta er óþurftar lexía, leyfið hundinum að borða matinn sinn í friði og ef það þarf að kenna þeim að það megi taka matinn þeirra eða beinið þá er árangursríkara að gefa þeim eitthvað betra í staðinn.  
Ef varðgelt er orðið vandamál hjá þínum hundi og rétt eins og þegar tekist er á við hræðslugelt sem orðið er að vana þá mælum við með því að leita ráða hjá hundaþjálfara sem styðst við jákvæðar aðferðir svo hægt sé að útbúa einstaklingsmiðaða þjálfun miðað við aðstæður og alvarleika.  

​Örvæntingargelt er gelt sem heyrist þegar hundurinn er í ómögulegum aðstæðunum og þörfum hans er ekki mætt. Það hljómar í hátíðni eða sama tón aftur og aftur og aftur. Kannski er hægt skilja örvæntingargelt með því að setja sig í spor Pug hundsins Magnúsar sem þó er betur staddur en margir þeir sem gelta á þennan hátt.  

Magnús er orðinn gamall og þarf því oft að fara út að pissa. Hann er vanur því að eigendur hans hleypi honum út þegar hann þarf en núorðið þarf hann að fara mun oftar út en þeir eru meðvitaðir um. Hann hefur alltaf gefið frá sér stutt gelt til að láta vita að hann þurfi að fara út og hingað til hefur það virkað vel. Núna geltir hann eins og vanalega en fær ekki að fara út því hann er líklega nýbúinn. Hann verður því örvæntingarfullur því hann vill ekki pissa inni. Eina ráðið er að gelta meira og hann geltir alltaf meira og meira því lengur sem hann þarf að bíða og hann verður örvæntingarfyllri með hverri mínútunni. Í tilfelli Magnúsar þyrftu eigendur hans að aðlaga skipulagið að aldri hans og hleypa honum út oftar og alltaf þegar hann gefur til kynna að hann þurfi að fara út. Geltið kemur til vegna þess að þörfum hans er ekki mætt.  
​
Örvæntingargelt er þannig viðbragð við erfiðum aðstæðum, einna helst einmanaleika og þegar þörfum hundsins er ekki mætt. Þessi tegund af gelti er algeng í hundaathvörfum. Besta leiðin til að eiga við örvæntingargelt er að skoða hvernig hægt er að uppfylla þarfir hundsins betur.  

Lært gelt er einfaldlega gelt sem er viðbragð við hegðun eiganda. Hundurinn hefur lært að gelta í einhverjum aðstæðum. Hann hefur fengið athygli (t.d. hrós eða skammir) fyrir gelt og hefur lært að með því fær hann viðbrögð, góð eða slæm og það styrkir geltið. Ef hundurinn geltir og horfir á eiganda sinn til að kanna viðbrögðin er klárlega um lært gelt að ræða. Lært gelt getur af þessum sökum hljómað á marga vegu þar sem styrkingin getur hafa átt sér stað í því tilfinningaástandi sem hundurinn var í á þeim tíma. Lært gelt er því oft ein tegund af ofangreindum tegundum af gelti til að byrja með en hundurinn væntir þess að fá „verðlaun” í formi viðbragða frá eiganda með því að gelta. Ef þú skammar hundinn fyrir að gelta þegar hann er að leita að viðbrögðum frá þér er hann að fá það sem hann leitaði eftir, athygli og viðbrögð í hvaða formi sem þau eru.  

Lært gelt er það sem gelt-tegundirnar sem við höfum rætt um áður er ekki, það er ekki sama vísbending um tilfinningaástand hundsins og hinar tegundirnar. Lært gelt er frekar vísbending um ágæti þitt sem eiganda þar sem þér hefur tekist fullkomlega að kenna hundinum þínum að gelta.  

Standard púðlan Sif geltir á börn á aldrinum 5-8 ára eða þar um bil. Eigandi Sifjar á 6 ára tvíburafrænkur og þegar þær koma í heimsókn er hann allur á nálum því þegar hún fékk sér hund hafði hún einsett sér að börnin í fjölskyldunni yrðu langbestu vinir hundsins. Sif gelti eitt sinn á tvíburana þegar þær komu í pössun og brást eigandi hennar við hið snarasta og skammaði hana því hún kærir sig alls ekki um að eiga hund sem hræðir börn. Sif fékk því loksins langþráða athygli þegar hún fékk skammir fyrir geltið en tvíburafrænkurnar voru gráðugar á athyglina þegar þær komu í heimsókn. Þannig fór að púðlan Sif geltir nú alltaf á börn á þessum aldri því við geltið fékk hún athygli eigandans um leið og fær enn.  

Til þess að eiga við lært gelt þarf eigandinn eða sá sem sá um að styrkja geltið með athygli sinni að átta sig á því að hann sjálfur bæði kenndi og viðheldur geltinu hjá hundinum. Til að snúa þessu við þarf eigandinn að breyta sínum viðbrögðum og hætta að styrkja geltið hjá hundinum. Í öðrum orðum þarf að hætta alfarið að bregðast við þegar hundurinn geltir, lítur á eiganda og býst svo við viðbrögðum. Geltið gæti aukist áður en það minnkar aftur, en ef hundurinn fær ekki viðbrögð í kjölfar gelts af þessari tegund ætti það að minnka þar sem athyglin er engin, hvort sem hundurinn var vanur að fá skammir eða hrós.  
​
Flokkarnir sex sem talað er um hér að ofan eru byggðir á flokkun og greiningu Turid Rugaas og mörg þeirra ráða sem hún talar um eru tíunduð við hvern flokk af gelti þó það sé ekki algilt.  
​
Það sem mikilvægast er að sitji eftir við lok lesturs þessarar greinar er að gelt er ekki bara gjamm út í loftið, það gefur okkur upplýsingar sem geta nýst okkur til að skilja og byggja upp betra samband við hundana okkar. Heyrst hefur að eftir að hundaeigendur fóru að halda geltdagbók eins og lýst er og sýnt er dæmi um í upphafi greinarinnar sjá þeir oftar en ekki að hundarnir þeirra gelta mun minna en þeir héldu áður en farið var í að kanna það til hlítar. Það að átta sig á því að hundurinn þinn geltir mun minna en þú hélst getur út af fyrir sig verið lausn á geltvandamáli þar sem við vitum öll fyrir víst að hundar gelta. Gelt felur einnig í sér upplýsingar um líðan ferfætlinganna okkar og ef þú leyfir þér að hlusta gætir þú að líkindum auðveldlega tekið undir það að hundar gelta.. sem betur fer. 

Heimildir:  
Pongrácz, P., Molnár, C. & Miklósi, A. (2010). Barking in family dogs: An ethological approach. The Veterinary Journal, vol. 183(2): 141-147.  
Rugaas, T. (2006). On Talking Terms with Dogs: Calming Signals. (2nd ed.).  
Rugaas, Turid (2008). Barking: The Sound of a Language. R. Butler, Sargisson, R.J & Eliffe, D. (2011). The efficacy of systematic desensitization for treating the separation- related problem behaviour of domestic dogs. Applied Animal Behaviour Science, vol 129(2): 136-145. 
 ​

Á síðustu hundasýningu ár hvert heiðrar Hundaræktarfélag Íslands afreks- og þjónustuhunda ársins, og í ár verður síðasta sýning ársins haldin 23. – 24. nóvember í Samskipahöllinni í Kópavogi.

Annað árið í röð leitaði Sámur eftir tilnefningum í verkefnið og bárust fimm tilnefningar. Tveir afrekshundar voru tilnefndir og þrír þjónustuhundar.  
Hér kynnumst við þessum fimm hundum sem allir gegna mikilvægu starfi í samfélaginu.

​​Nú gefst lesendum Sáms kostur á að velja sinn afrekshund og sinn þjónustuhund sem verða heiðraðir á nóvember sýningu félagsins.
Kosningu er lokið, hægt var að kjósa til klukkan 22:00 -14. nóvember 2024.

Afrekshundar eru þeir sem hafa komið að björgun manna eða dýra, hafa liðsinnt einstaklingum með fötlun eða veikindi, eða hafa verið til uppörvunar á einn eða annan hátt.
Hundar sem tilnefndir í þessum flokki eru:

• Kátur fann gamla konu sem hafði dottið og gat ekki komið sér aftur á fætur,
• Úffi sem vakti eiganda sinn og lét vita af því að húsið væri að brenna.

Þjónustuhundar eru þeir sem vinna allan ársins hring að þjónustu í samfélaginu, t.d. lögregluhundar, fíkniefnaleitarhundar, tollhundar, björgunarhundar og aðrir sem vinna mikilvæg störf.
Hundar sem tilnefndir í þessum flokki eru:

• Loki björgunarhundur,
• Vinkel fíkniefnahundur,
• Skotta þjónustuhundur.

.

Kátur - tilnefndur sem afrekshundur ársins
Kátur er tveggja ára ekta sveitahundur ættaður úr Eyjafirðinum og er hvers manns hugljúfi. Hann er rólegur á heimili og góður við ketti og börn, dag einn var hann á göngu með Rafney eftir skóla. Rafney var með heyrnartól á eyrunum og var að hlusta á tónlist og heyrði því ekki mikið hvað var að gerast í kringum hana. Þegar þau voru að ganga í gegnum róluvöll fór Kátur allt í einu af stað, togaði og togaði í tauminn og Rafney réð ekkert við hann þrátt fyrir að vera sterk og streitast á móti togaði Kátur enn meira og byrjaði að gelta sem hann gerir aldrei. Hún tók því af sér heyrnartólin og lét tauminn eftir, svo Kátur hljóp af stað en stoppaði neðst á róluvellinum við girðingu. Þar heyrði Rafney rödd, en hinumegin við girðinguna sat gömul kona sem hafði dottið og gat ekki staðið upp aftur. Rafney hringdi í pabba sinn Guðmund Valdimar Rafnsson þar sem hann vinnur skammt frá staðnum sem konan var. Hann henti frá sér verkfærum og æddi af stað á fullri ferð til dóttur sinnar þar sem hann hjálpaði gömlu konunni á lappir sem var sem betur fer ómeidd en máttfarin og hrædd. Konan sem er heilsuveil og með heilabilun býr ein, var heppin að Kátur fann hana, þar sem stuttu seinna byrjaði að snjóa og það er næsta víst að hún hefði ekki fundist nærri strax. Það er því líklegt að Kátur hafi bjargað mannslífi þennan dag.  

Úffi - tilnefndur sem afrekshundur ársins
Úffi er 8 ára þýskur fjárhundur sem bjargaði Margréti Víkingsdóttur, eiganda sínum frá eldsvoða. Hann vakti hana óvenju snemma þennan morgun og hætti ekki fyrr en Margrét fór á fætur. En þegar á fætur var komið fann Margrét óeðlilega lykt og hélt hún að það væri einhver úti að grilla en þá rann upp fyrir henni að húsið væri að brenna. Hún reyndi að vekja nágranna sinn með öllum mögulegum ráðum en fékk engin viðbrögð, nágranninn var síðar fluttur á sjúkrahús þar sem hann var úrskurðaður látinn. Margrét segir að Úffi hafi í það minnsta bjargað henni frá reykeitrun. 

Loki - tilnefndur sem þjónustuhundur ársins 
Íslenski fjárhundurinn Loki er fæddur árið 2016, hann er þaulþjálfaður björgunarhundur sem starfar með Gunnari Þór Kristinssyni og skipa þeir teymi í Björgunarhundasveit Íslands (BHSÍ). Þeir félagar hafa ferðast víða um land til að taka þáttum í leitum að fólki og vera til taks og tilbúnir í verkefni ef á þarf að halda. Loki er með gráðu A bæði í vetrar og sumarleit, og er á útkallslista BHSÍ og tók það Gunnar um það bil 4 til 5 ár að fullþjálfa hann. Gunnar hefur lýst Loka sem ákveðnum, þrjóskum, útsjónarsömum og með mikið andlegt úthald sem séu allt kostir sem nýtast vel í starfi björgunarhunds.
Hægt er að lesa meira um þjálfun björgunarsveitahunda hér: https://www.hundasamur.is/greinar1/gunnar-or-og-bjorgunarhundurinn-loki

​Vinkel - tilnefndur sem þjónustuhundur ársins
Mig langar að tilnefna fíkniefna hundinn Vinkel sem þjónustuhund ársins. Ég hef starfað sem fangavörður að verða um 17 ár á Litla Hrauni og Sogni og hef haft þann heiður að getað kallað Vinkel og Elínu Ósk þjálfara hans starfsfélaga mína. Það hefur verið magnað að fylgjast með Vinkel í vinnu og sjá árangurinn sem hann hefur skilað í gegnum árin ásamt fangaverðinum Elínu Ósk sem er umsjónamaður og þjálfari Vinkel.
Labradorinn Vinkel er fæddur i apríl 2010, n.t.t. á sumardaginn fyrsta. Hann er undan Nelson og Ellu sem bæði störfuðu sem fíkniefna-leitarhundar hjá lögreglu og tolli.
Vinkel var nefndur eftir forstjóra Fangelsismálastofnunar, Páli Winkel, þar sem Páli langaði að eiga nafna innan stofnunarinnar.
Það varð fljótt ljóst að Vinkel var efnilegur leitarhundur og var fljótlega byrjað að þjálfa hann sem fíkniefnaleitarhund fyrir Fangelsismálastofnun. Hann fór í gegnum grunnnámskeið fíkniefnaleitarhunda ásamt þjálfara sinum og hélt svo áfram i stífri þjálfun. Vinkel kláraði svo grunnþjálfunina og byrjaði að vinna 2011.
Eins og áður segir starfaði Vinkel fyrir Fangelsismálastofnun og leitaði fíkniefna i fangelsum landsins. Hann starfaði einnig fyrir lögreglu og toll í ýmsum verkefnum, s.s. á hinum ýmsu útihátíðum, við ýmis fíkniefnamál er komu upp o.fl. Vinkel var mjög vinnusamur og fannst ekkert skemmtilegra en að vinna. Hann þefaði upp mikið magn fíkniefna í gegnum tíðina og var mjög lunkinn við það. Lífið hjá Vinkel var samt ekki allaf dans á rósum. Hann veiktist mikið í tvígang og var nærri dauða en lífi í bæði skiptin. Þá fótbrotnaði hann einnig á vondum stað en alltaf stóð hann upp aftur og kom til baka í vinnu. Vinkel hætti að vinna síðla árs 2018 og hefur verið á eftirlaunum síðan. Hann er við góða heilsu þrátt fyrir háan aldur. Vinkel ​var notaður til undaneldis við Labrador tík og úr því goti kom efnilegur fíkniefnahundur sem hlaut nafnið Riffill. Riffill starfaði við hlið föður síns um tíma og tók svo við af honum þegar Vinkel fór á eftirlaun. Hann var líka notaðir til undaneldis með Þoku sem var fíkniefnahundur á Norðurlandi vestra og átti 3 rakka, Gonna, Byl og Storm sem allir urðu góðir fíkniefnahundar, Gonni starfaði sem fíkniefnahundur fyrir tollinn, Bylur fyrir lögregluna og Stormur fyrir fangelsi landsins. Einnig var ein tík undan honum leitarhundur í björgunarsveit og því óhætt að segja að hann hafi gefið af sér mjög efnileg afkvæmi. Elín Ósk hefur verið þjálfari og umsjónarmaður Vinkel, Riffils og Storms og er óhætt að segja að þarna fari fagmennska og væntumþykja til starfsins og hundana saman sem hefur skilað þessum glæsilegu og efnilegu þjónustuhundum.
Kristín Jóna Símonardóttir, aðstoðarvarðstjóri fangelsinu Sogni tilnefndi Vinkel ​sem þjónustuhund ársins. 

Skotta - tilnefnd sem þjónustuhundur ársins
Skotta eða Norðan Heiða Svartaþoka Skotta er 8 ára og af tegundinni flat-coated retriever, hún er fyrsti vottaði þjónustuhundurinn á Íslandi. Eigandi hennar og þjálfari er Gunnhildur Jakobsdóttir, iðjuþjálfari hjá Æfingastöðinni sem er miðstöð þjónustu og þekkingar í hæfingu og endurhæfingu fyrir börn og ungmenni.
Skotta er ofboðslega vinnusöm, með mikið úthald og hefur einlæga ánægju af því að vera í samskiptum við börn og sýnir það með innilegum móttökum, samvinnu og gleði. Hún unir bæði vel að fá að taka virkan þátt í tímunum sem og að vera passívur þátttakandi. Með virkum verkefnum er átt við þegar krakkarnir kasta fyrir hana, fá hana til að hlaupa kringum keilur, hoppa yfir hindranir, leita að földum hlut eða fá hana til að gera ýmsar kúnstir. Þegar hún er passívur þátttakandi þá er hún viðstödd í sama rými og barnið er að vinna í t.d. við borðvinnu. Þá tekur hún ekki beinan þátt, er bara til staðar og þá er stundum leikið við hana eftir að verkefninu er lokið.

Dagurinn 18. júlí er afmælisdagur Mark Watson, sem var fæddur í Bretlandi árið 1906. Mark Watson var einn af þeim sem kom auga á það á ferð sinni um Ísland sumarið 1939 að hundategundin, íslenskur fjárhundur, væri í mikilli útrýmingarhættu. Hann ákvað því að leggja sitt lóð á vogaskálarnar með það að markmiði að bjarga tegundinni. Hann keypti fjórar tíkur og fjóra rakka sem voru af réttri tegundagerð og lét senda til Bandaríkjanna þar sem hann bjó um tíma. Seinna flutti Watson aftur til Bretlands og tók hundana með sér þangað þar sem ræktuninni var haldið áfram. Árið 1956 gaf hann út bókina „The Icelandic dog 874-1956“. Í bókinni má finna meðal annars heimildir, teikningar og myndir af íslenskum fjárhundum sem hann tók saman.​

Árið 1967 hóf Sigríður Pétursdóttir á Ólafsvöllum skipulagt ræktunarstarf í samvinnu við Pál A. Pálsson, Watson og fleiri. Sigríður fékk leyfi til að flytja inn tvo hvolpa til Íslands frá Bretlandi sem Watson gaf henni að gjöf og út frá nokkrum hundum hóf Sigríður ræktun á íslenska fjárhundinum á Íslandi.
Í framhaldi af ræktun íslenska fjárhundsins var Hundaræktarfélag Íslands stofnað með það að markmiði að vernda og rækta íslenska fjárhundinn.

Íslenski fjárhundurinn er með upprétt eyru, hringað skott og fjárspora, hann er glaður og vingjarnlegur, forvitinn, fjörmikill með ljúfa lund og óhræddur. Vinsældir tegundarinnar hafa aukist víða um heim og telst tegundin ekki lengur í útrýmingarhættu. ​

​Myndir frá deginum: ​

Höfum dyrnar opnar  
Samskiptahæfileikar, persónuleg kunnátta og færni er mikilvægur þáttur í allri vinnu ræktandans. Farsæll ræktandi ætti að eiga góð, eða í það minnsta kosti þokkaleg samskipti við aðra ræktendur, í stað þess að vera þver og dæma vinnu annarra ræktenda. Toppræktandi á að fylgjast með og læra. Að reyna að skilja er erfiðara en að dæma. Toppræktandi ætti einnig að heilsa og segja eitthvað viðkunnanlegt við aðra ræktendur af og til. Sá skynsami ræktandi gæti haft allar sínar dyr opnar þegar til lengri tíma er litið. Hvað ef byrjandi í ræktun ætti í erfiðleikum í upphafi en ætti úrvals hunda eftir tíu ár? Þú hefðir síðar meir möguleika á að nota frá honum hund til ræktunar. Þessi sami byrjandi gæti jafnvel keypt af þér hund seinna meir.
Þið gætuð unnið saman og það samstarf verið til hagsbóta fyrir báða aðila. 
Brýr eru of oft brenndar á frumstigi og árangursríkt samstarf slegið út af borðinu. Ekki slúðra um náungann, bein samskipti eru alltaf betri leið í samskiptum við aðra ræktendur. 

Toppræktendur ættu að ferðast eins mikið og mögulegt er. Stundum fara fyrstu ferðirnar í súginn, skilja lítið sem ekkert eftir sig. Það er mjög algengt að sjá einungis stóra muninn og gallana í byrjun. Eftir því sem ferðalögunum fjölgar þá opnast hugurinn smátt og smátt. Innihaldsrík og djúp samtöl við aðra ræktendur frá öðrum löndum ættu að hjálpa til við að sjá hlutina í öðru ljósi. Ræktendablinda er enn algengasti veikleikinn hjá ræktendum. 

Ekki láta smáatriðin stífla huga þinn. 
Það er mjög algengt að það sé þannig þegar fyrstu kynslóðirnar eru verið ræktaðar. Ræktendur hafa valið mikilvæg einkenni sem þeir vilja halda í ræktuninni. Þetta getur leitt til mjög takmarkaðrar ræktunar og hugsunar. 
Fólk er mjög oft búið að velja sér línu sem þeir eru fastir í alla tíð. Þeir eru með línuræktun kynslóð eftir kynslóð, og nota sömu hundana. Þeir sjá bara það góða í sínum línum og það slæma í annarra manna línum. Eftir því sem árin líða sjá þeir ekki hvernig frjósemi og kraftur fer þverrandi. Stóra myndin týnist. 
Höfuðlag eða svipur getur tekið yfir. Sem fagmaður muntu eiga sífellt auðveldara með að skilja fínu smáatriðin. Þú nýtur virðingar vegna mikillar þekkingar þinnar. Því miður er það of algengt að þessi mikla sérhæfing í smáatriðum getur tekið yfirhöndina og bygging og hreyfingar hundanna orðið undir. Því það er stóra heildarmyndin og lykillinn að heilbrigðum hundi. Það er hræðilegt að sjá frábæran hund fara til spillis vegna þess að eitt smáatriði er ekki rétt. Þessi hundur sem er óskyldur þinni línu er hundur sem gæti hjálpað ræktuninni heilmikið – en lokaður hugur getur ekki gert sér grein fyrir dýrmætinu þar sem fókusinn er á smáatriðin. 
 
Þín eigin leið 
Finndu þína eigin leið til að gera hlutina. Reyndu að hafa huga þinn eins opinn og mögulegt er. Hlustaðu og sjáðu allt sem þú getur. Fylgstu með og reyndu að skilja hvað er að gerast hjá tegundinni þinni. Treystu á sjálfan þig og leggðu mat þitt á það hvað rétt er og hvað rangt. Stundum eru hin virðulegustu nöfn í ræktunarheiminum að gefa of hlutlægt mat eða jafnvel rangar upplýsingar. 

Allir hafa sína eigin hvata og ástæður. Hafðu það alltaf hugfast og fylgdu sannfæringu þinni og almennri skynsemi. Því miður verður heimur hreinræktaðra hunda oft mjög persónulegur og einstaklingsbundinn. Reyndu að sporna gegn því. Reyndu að vera eins skynsamur og hlutlaus og hægt er. Það er góð regla. Ekki taka málstað einhvers of oft. Ferðastu um og sjáðu heiminn. Segðu viðkunnanleg orð eins oft og þú getur. Menntaðu sjálfan þig og vertu til staðar fyrir hundaræktarfélagið þitt. Ekki gleyma að læra um grundvallaratriðin: líkamsbyggingu og heilsufar. Reyndu að vera dómari og notaðu þekkinguna sem deildin og félagið þitt hefur upp á að bjóða. Reyndu að byggja brýr í stað þess að brenna þær niður. Reyndu fyrst og fremst að hafa alltaf stóru heildarmyndina í huga. Það er velferð og lífshamingja fallegu og líflegu hundanna þinna með sín dásamlegu smáatriði sem skipta máli fyrir þig. Hafðu heilbrigði þeirra ávallt í huga og reyndu að forðast öfgar. 

Ræktendur verða að hafa opinn huga. Byggjum upp, rífum ekki niður. Það er hægara sagt en gert en vel mögulegt. ​

Dagur ungmennadeildar HRFÍ var haldinn 26. maí 2024 í húsnæði HRFÍ. Fólki frá þriggja ára aldri var boðið að taka þátt í að sýna hunda þar sem yngstu sýnendunum var velkomið að taka með sér einhvern eldri inn í hringinn sér til stuðnings. Keppt var í 6 flokkum, barnaflokkum 3-5 ára og 6-9 ára þar sem ekki var raðað í sæti og allir voru sigurvegarar, ungir sýnendur yngri flokkur 10-12 ára og eldri flokkur 13-17 ára og að lokum fullorðins flokkunum 18-34 ára og 35+.

Þessi einstaklega skemmtilegi viðburður sameinar alla aldurshópa í áhugamálinu. Hægt var að gæða sér á vöfflum og fleira góðgæti sem var til sölu til styrktar deildarinnar á meðan fylgst var með stórsnjöllum sýnendum láta ljós sitt skína. Dómarar dagsins voru þau Bergdís Lilja Þorsteinsdóttir, Freyja Guðmundsdóttir og Maríus Þorri Ólason sem eru fyrrverandi ungir sýnendur auk Jóhönnu Sól Ingadóttur sem er ungur sýnandi í eldri flokki. 

Ungmennadeild félagsins heldur utan um ungu sýnendurnar okkar sem keppa á sýningum HRFÍ. Þau börn sem lenda í sæti fá stig og börn úr eldri flokki sem ná þeim árangri að verða með fjórum stigahæstu keppendum ársins skipa landslið félagsins og er boðið að keppa fyrir Íslands hönd í ungum sýnendum á stórum sýningum í útlöndum. Það sem af er ári hafa þær Freyja Guðmundsdóttir og Hrönn Valgeirsdóttir náð stórkostlegum árangri á þeim sýningum sem þær voru fulltrúar Íslands.

​Það má með sanni segja að starfið í ungmennadeild félagsins sé blómlegt og mikið um að vera, en undanfarin misseri hafa aðstandendur ungra sýnenda haft í nógu að snúast að mæta með börnunum á námskeið, sýningaþjálfanir og aðra viðburði sem boðið hefur verið upp á hjá deildinni.
​
Hér fyrir neðan má finna nokkrar svipmyndir frá deginum en fleiri myndir má nálgast á facebook síðu ungmennadeildar og hægt er að kynna sér starfsemi deildarinnar á vefsíðu ungmennadeildar. 

Hundar af stórum og mjög stórum hundategundum lifa að meðaltali mun styttra en hundar af minni tegundum. Bein tenging er á milli stærðar hunda og líftíma þeirra, hundar af stærstu hundategundunum lifa að meðaltali í um 7 til 8 ár á meðan hundar af minni hundategundum lifa að meðaltali lengur en í 12 ár.
Það er ótal margt sem hægt er að gera til að heimilishundurinn lifi sem lengsta og heilbrigðasta lífinu, en þar má nefna atriði eins og að halda honum í heilbrigðri þyngd og hugsa um líkamlega og andlega heilsu hans, en þrátt fyrir góða umhirðu og heimili fullt af ást og umhyggju getum við ekki breytt erfðamengi hundsins.

Lyfjafyrirtækið Loyal for dogs í Bandaríkjunum hefur unnið að því að þróa lyf sem meðal annars er ætlað hundum af stórum og mjög stórum hundategundum með það að markmiði að lengja líf þeirra og lengja tímann sem hundarnir búa að góðri heilsu. Markmið fyrirtækisins er að hægt verði að lengja líf hunda um að minnsta kosti 1 ár. Um er að ræða lyfin LOY-001, LOY-002 og LOY-003 sem hafa ekki verið samþykkt hjá bandarísku lyfja og -matvælastofnununni (FDA). 

Verður hægt að lengja líf stóru hundanna?
Lyfin sem kallast LOY-001 og LOY-003 eru einungis ætluð stórum og mjög stórum hundum. Lyfjunum er ætlað að seinka ótímabærri öldrun og lengja líf hunda. Um er að ræða sama lyf í mismunandi lyfjaformi. Lyfið LOY-001 er gefið í sprautuformi á þriggja til sex mánaða fresti og LOY-003 er gefið í töfluformi daglega. Lyfið lækkar insúlínlíkan vaxtarþátt 1 (IGF-1) sem er hormón sem mælist oft hærra hjá stórum hundategundum og lægra hjá þeim minni. Rannsóknir gefa vísbendingar um að hækkað magn af þessu tiltekna hormóni hafi neikvæð áhrif á líftíma og hraði hugsanlega öldrunarferlinu. Aukaverkanir af lyfinu sem hafa komið fram hingað til eru mild og tímabundin óþægindi í meltingavegi. Þrátt fyrri að vera á forklínísku stigi í rannsóknum hefur FDA gefið út að lyfið lofi góðu. Fái lyfið samþykki FDA gæti það verið aðgengilegt hundaeigendum með milligöngu dýralækna árið 2026.

Lyf sem gæti seinkað öldrun og lengt líf flestra hunda
Lyfið sem hefur fengið heitið LOY-002 er ætlað að lengja líftíma og seinka öldrun fyrir hunda af öllum stærðum og gerðum að undanskildum þeim allra minnstu. Lyfið er talið bæta efnaskiptahæfni líkamans sem talið er lengja líf og bæta heilsu hunda á efri árum. Lyfið er gefið daglega í töfluformi. LOY-002 er komið lengra á veg í rannsóknum en LOY-001 & 003 en fyrirtækið er nú að hefja eina stærstu klínísku dýralækna-rannsókn sinnar tegundar.  Rannsóknin sem kallast STAY er gerð í samvinnu við fleiri en 50 dýralæknastofur víðs vegar um Bandaríkin og gert er ráð fyrir að hún muni standa í 4 ár og innihaldi þátttöku 1000 hunda.
Þó ekki sé um nákvæmlega sama efnasamband að ræða virkar LOY-002 á svipaðan hátt og lyfið Rapamycin sem gefið er líffæraþegum. Lyfið sem er öflugt ónæmisbælandi lyf hefur það hlutverk að koma í veg fyrir að líkaminn hafni ígræddu líffæri. Sýnt hefur verið fram á að notkun lyfsins geti lengt líf tilraunamúsa.
Ef FDA veitir skilyrt samþykki fyrir LOY-002 munu dýralæknar í Bandaríkjunum geta ávísað lyfinu til hunda sem uppfylla tilskilin skilyrði strax í byrjun árs 2025.
 
Heimildir:
https://loyalfordogs.com/
https://www.nytimes.com/2023/11/28/science/longevity-drugs-dogs.html
https://www.lyfja.is/lyfjabokin/lyf/Rapamune
 

​Fyrsti hundurinn af tegundinni Yakutian Laika kom hingað til lands árið 2023 og vitað er um þrjá slíka á landinu. Hundarnir eru fjölhæfir vinnuhundar með tvöfaldan feld sem bera margskonar liti í bland við hvítan. Upprunaland tegundarinnar er Rússland.
FCI: Sleða og veiðihundur – tegundahópur 5.

Dagana 1.-2. október síðastliðinn stóð Æfingastöðin, endurhæfingamiðstöð fyrir börn og ungmenni fyrir námskeiðinu „Íhlutun með aðstoð hunds“ í húsakynnum Reykjadals í Mosfellsdal. Námskeiðið var einkum ætlað fagfólki á sviði heilbrigðis-, félags- og menntaþjónustu sem hafa áhuga á að styðjast við hund í sínu starfi. Var um annað námskeiðið af þessum toga sem haldið hefur verið af Æfingarstöðinni.
 
Á fallegum sunnudagsmorgni á fyrsta degi októbermánaðar var námskeiðið haldið í Reykjadal þar sem Styrktarfélag lamaðra og fatlaðra hafa um áratugaskeið rekið sumarbúðir fyrir fötluð börn og ungmenni. Fulltrúi frá Sámi fékk að sitja námskeiðið.

Border collie er meðal stór hundur, kjörhæð hunda er 53 cm. á herðakamb en tíka aðeins lægri.
Hann er mjög meðfærilegur, þolgóður og vinnusamur fjárhundur, ákafur og vakandi, móttækilegur og gáfaður. Hvorki taugaveiklaður né árásargjarn.

Almennt útlit: Góð hlutföll, jafnar útlínur sem sýna gæði, tígulleika og fullkomið jafnvægi ásamt nægri fyllingu til að gefa þol til kynna. Allar tilhneigingar sem benda til grófleika eða veikleika eru óæskilegar.
Mikilvæg hlutföll: Höfuðkúpa og trýni u.þ.b. jafn löng. Búkurinn á að vera aðeins lengri en axlarhæðin.
Höfuð og hauskúpa: Kúpan er frekar breið, hnakkinn lítið áberandi. Kinnar hvorki bústnar né kringlóttar. Vöðvinn sem mjókkar niður að nefinu er hæfilega stuttur og sterkur. Stoppið er greinilegt.
Nefið: Það skal vera svart nema á brúnum hundum en á þeim má það vera brúnt. Á kolgráum ætti nefið að vera dökkkolgrátt. Nasir eru vel þroskaðar.
Augu: Það er langt á milli þeirra, egglaga, miðlungsstór, brún nema á kolgráum hundum sem mega hafa annað eða bæði eða hluta af öðru eða báðum augum dökkblágrá. Svipur mildur, ákafur, vakandi og gáfulegur.  Yrjóttir hundar mega hafa annað eða bæði eða hluta af öðru eða báðum augum blá.
Eyru: Meðalstór með góðu bili. Hálf upprétt eða upprétt. Næm í notkun.
Munnur: Tennur og kjálkar sterk með fullkomið skærabit. Örlítið yfirbit. Jaxlar beinir.
Háls: Góð lengd, sterkir vöðvar, dálítið bogin og breikkar niður að öxlum.
Framhluti: Framfætur eru samsíða þegar þeir eru skoðaðir framan frá. Kjúkan hallast dálítið skoðuð frá hlið. Beinin eru sterk en ekki þung. Axlirnar liggja vel aftur, olnbogar nálægt líkamanum.
Búkur: Stæltur, rifbein fjaðrandi. Bringan hvelfd og frekar breið, lendar hvelfdar og kraftalegar en ekki samandregnar. Búkurinn örlítið lengri en hæð á herðar.
Afturhluti: Breiður, kraftalegur frá hlið (hallast þokkafullur að skottinu) Skottið aflíðandi frá lend. Lærin eru löng og hvelfd, kraftaleg með vel beygðum hnjáliðum og sterkir, greinilegir hæklar. Frá hækli og niður eru afturfætur beinaberir og samsíða þegar skoðað er aftan frá.
Fætur: Egglaga, þófar, djúpir og sterkir. Tær bognar og þétt saman. Klær stuttar og sterkar.
Skott: Miðlungs langt, brjóskið nær niður að hælbeini, liggur lágt, vel loðið og beygist neðst upp í krók og fullkomnar tígulegt yfirbragð og jafnvægi hundsins. Skottið má lyftast þegar hann er spenntur en það liggur aldrei yfir bakið.
Göngulag og hreyfingar: Frjálst mjúkt og líflegt með lítilli fótlyftu sem gefur til kynna hæfileika til að hreyfa sig hratt og laumulega.
Feldur: Tvær feldgerðir 1) meðallöng hár 2) snöggur feldur. Í báðum tilfellum eru yfirhárin þétt með miðlungs áferð, undirhárin eru mjúk og þétt og verja vel fyrir veðri. Miðlungs feldur, hefur tilbrigði, langhærður feldur myndast á makka, afturenda og skotti Á andliti, eyrum og framlöppum ( að undanskildum hárbrúski aftan á löpp) á löppum frá hækli að jörð eiga hárin að vera stutt og mjúk.
Litur: Allir litir leyfilegir. Hvítt má þó aldrei vera yfirgnæfandi.
Hundar skulu hafa tvö eðlileg eistu sem eiga að vera komin niður í punginn.
Gallar: Öll frávik frá ofangreindu skal líta á sem galla. Meta skal gallana í nákvæmu hlutfalli við það hve áberandi þeir eru, hve mikil áhrif þau hafa á heilsu og velferð hundsins sem og getu hans til að sinna þeirri vinnu sem hann er ræktaður til.
Gallar sem valda því að hundur sé dæmdur úr keppni: Árásargirni eða yfirdrifin feimni. Allir hundar sem sýna greinileg líkamleg einkenni og/eða afbrigðilega hegðun skal dæma úr keppni.

​Árið 2023 var viðburðaríkt hjá félaginu og ótal hundar sýndir á hundasýningum, tóku þátt í veiðiprófum, sporaprófum og hlýðniprófum. Skrifstofa félagsins var flutt í nýtt húsnæði sem er staðsett á Melabraut í Hafnafirði og Erna Sigríður Ómarsdóttir tók við sem nýr formaður félagsins. Ágústa Pétursdóttir var ráðin sem framkvæmdastjóri og hóf störf á nýju ári. Ný vefsíða félagsins var opnuð sem býður upp á fleiri möguleika en sú gamla. Norðurlandakeppni ungra sýnenda var haldin í fyrsta sinn á Íslandi þar sem landslið Íslands í ungum sýnendum keppti og gekk með eindæmum vel. Reglur fyrir rallý hlýðni voru samþykktar og geta nú hundar unnið sér inn titla í þeirri skemmtilegu íþrótt. Félagsmönnum stóð til boða námskeið  með Natalja Skalin sem er dýralæknir, ræktandi og sýningadómari, að auki voru haldin námskeið fyrir ritara og hringstjóra. Það er því óhætt að segja að nóg sé um að vera fyrir hundaeigendur og hunda þeirra innan félagsins. Hér fyrir neðan má finna upplýsingar og mynd þerirra sem sköruðu fram úr á árinu á hundasýningum, í hlýðni, í spori og í veiði. 

​Þó að sýningaárið sé ekki liðið er ljóst að enski cocker spaniel hundurinn Amigo, ISSHCH NORDICCH ISW22 RW 22-23 PLW20 (C.I.E. bíður staðfestingar) Haradwater I Dont Care, er stigahæsti hundur ársins 2023. Hann hefur náð eftirtektarverðum árangri á árinu, hefur landað öllum fjórum sætum í „Best In Show” , og er sem stendur með 42 stig og því  ósigrandi! Hann gæti því hæglega tekið lífinu með ró og sleppt þátttöku á nóvembersýningu Hundaræktarfélags Íslands. Amigo er suðurnesjapiltur og er í eigu Þórdísar Maríu Hafsteinsdóttur og fjölskyldu en Þórdís hefur náð mjög góðum árangri í ræktun sinni undir ræktunarnafninu Leirdals. 

Rannveig Gauja Guðbjartsdóttir - landsliðsþjálfari
Nafn - Rannveig Gauja Guðbjartsdóttir.
Gælunafn - Bara Gauja.
Aldur - 31 árs.
Stjörnumerki - Krabbi.
Atvinna - Sölu- og markaðsstjóri Dýrheima.
Uppáhalds drykkur? - Pepsi max … eða á ég að segja vatn kannski frekar?
Hvað færð þú þér í bragðaref? -  Jarðarber, Þrist og Hockeypullver dýfu.
Uppáhalds sjónvarpsþáttur? - IceGuys eru uppáhalds þættirnir mínir og Emily in Paris.
Uppáhalds tónlistarmaður? - Oh my þetta er erfitt, held að Beyoncé hafi vinninginn (og Birgitta Haukdal).
Er hundur/hundar á þínu heimili og hvaða tegund?
Já tveir hundar, einn papillon og einn irish setter.
Hvenær sýndir þú þinn fyrsta hund og hvernig hundur var það?
Ég var 10 ára og það var fyrsti papilloninn minn hún Alex.
Hver er þín helsta fyrirmynd sem sýnandi?
Auður Sif Sigurgeirsdóttir.
Ef þú mættir eiga hvaða tegund sem er fyrir utan þá tegund er býr á heimili þínu í dag hvaða tegund myndir þú velja og af hverju?
Ég myndi velja enskan cocker spaniel – ég elska svona gleðipinna og held þeir myndu henta mér og mínum lífstíl mjög vel.
Tókst þú þátt í keppni ungra sýnenda þegar þú hafðir aldur til og varst þú einhvern tímann í landsliðinu fyrir Íslands hönd?
Já ég byrjaði 10 ára að sýna og komst í landsliðið á síðasta árinu mínu í ungum. Þá kepptum við í Finnlandi og liðið varð í öðru sæti í liðakeppninni.
Nú verður keppnin haldin hér heima í ár, heldur þú að það verði eitthvað öðruvísi fyrir íslenska liðið að keppa hér en úti og hvað þá helst?
Já það verður auðvitað eitthvað öðruvísi. Það verður auðvitað ótrúlega gaman að hafa fleiri stuðningsmenn í klappliðinu þrátt fyrir að við höfum verið mjög heppin með að Íslendingar eru duglegir að sækja sýningarnar sem við höfum keppt á erlendis. En það er alltaf gaman að vera á „heimavelli“.
Er undirbúningurinn með liðið eitthvað öðruvísi núna þar sem keppnin verður hér á landi?
Nei myndi kannski ekki segja það nema bara það að stelpurnar hafa úr færri hundum að velja þegar við erum að æfa, þar sem við pössum rosalega vel uppá að þær séu ekki að taka fullt af nýjum hundum til að það sé auðveldara fyrir skipuleggjendur að passa upp á að þær fái ekki hunda sem þær hafa snert. Það er auðvitað ákveðið challenge í því að hafa ekki allt „frelsið“ til að prófa nýja hunda því það er gott að æfa sig að takast á við það á æfingum þar sem krakkarnir fá bara klukkutíma til að kynnast þeim hundum sem þau sýna í keppninni.
Hvernig leggst verkefnið í þig?
Ótrúlega vel, við erum með frábær gæði í liðinu og þær eru svo ótrúlega metnaðarfullar og duglegar að æfa – ungmennastarfið á Íslandi er í svo miklum uppvexti og það er svo gaman að sjá hæfileikana hjá þessum krökkum. Mér þykir ótrúlega vænt um starfið og vona að þetta haldi áfram á þessari braut næstu árin.
Nú hefur það að fara erlendis með liðið alltaf þjappað liðinu enn meira saman og myndað sterkari tengsl milli aðila. Munið þið vera saman á hóteli yfir helgina eða vera með gistipartý fyrir keppnina?
Já einmitt, það er eitthvað sem mér finnst mjög mikilvægt og í ár verðum við saman á hóteli með hinum liðunum frá föstudegi til laugardags. Það verður mjög skemmtilegt og hristir liðið enn betur saman.
Sturluðu staðreynd um þig sjálfa?
Ég byrjaði ekki að borða banana fyrr en ég var 26 ára.
Hvað er lífsmottóið þitt?
Komdu fram við náungan eins og þú vilt að komið sé fram við þig ❤️.  

Brynja Kristín Magnúsdóttir - aðstoðarþjálfari
Nafn - Brynja Kristín Magnúsdóttir.
Gælunafn – Brynja.
Aldur – 28 ára.
Stjörnumerki – Krabbi.
Atvinna – Lögmaður.
Uppáhalds drykkur? - Ætli það sé ekki ískaldur Collab.
Hvað færð þú þér í bragðaref?
Þrist, jarðarber og þriðja innihaldsefnið er Hockey Pulver, sem er lykillinn að góðum bragðaref.
Uppáhalds sjónvarpsþáttur?
Heimsókn með Sindra, bind vonir við að hann komi í heimsókn til mín einn daginn.
Uppáhalds tónlistarmaður?
Margir uppáhalds en Bubbi Morthens er ofarlega á lista.
Er hundur/hundar á þínu heimili og hvaða tegund?
Það er enginn hundur á mínu heimili núna en ég þarf að fara að bæta úr því.
Hvenær sýndir þú þinn fyrsta hund og hvernig hundur var það?
Fyrsti hundurinn sem ég sýndi var jafnframt minn fyrsti hundur en það var cavalier tíkin Týra.
Hver er þín helsta fyrirmynd sem sýnandi?
Ég er ekki með einhverja eina fyrirmynd heldur eru margir sem ég lít upp til sem eru að gera góða hluti.
Ef þú mættir eiga hvaða tegund sem er, hvaða tegund myndir þú velja og af hverju?
Það eru margar tegundir sem heilla mig en fyrsta tegundin sem varð í miklu uppáhaldi og ég var staðráðin í að eignast einn daginn er weimaraner. Það er mjög skemmtilegt að vinna með þeim og það skemmir ekki fyrir hvað þeir eru fallegir.
Tókst þú þátt í keppni ungra sýnenda þegar þú hafðir aldur til og varst þú einhvern tímann í landsliðinu fyrir Íslands hönd?
Ég tók þátt í ungum sýnendum öll árin sem ég hafði aldur til og var í landsliðinu.
Nú verður keppnin haldin hér heima í ár, heldur þú að það verði eitthvað öðruvísi fyrir íslenska liðið að keppa hér en úti og hvað þá helst?
Ég hugsa að keppnin verði öðruvísi að einhverju leyti. Það er jákvætt að fleiri Íslendingar geta fylgst með keppninni og hvatt liðið áfram. Þetta er í fyrsta skipti sem Ísland heldur Nordic Winner svo það er mikil eftirvænting fyrir keppninni en ég held að liðið muni græða á því að hafa keppnina á „heimavelli“.
Er undirbúningurinn með liðið eitthvað öðruvísi núna þar sem keppnin verður hér á landi?
Undirbúningurinn er að meginstefnu til sá sami en það sem er helst öðruvísi er hvaða hunda þær geta tekið á æfingar. Í keppninni gildir sú regla að öll liðin standi jöfnum fæti þannig að íslenska liðið má ekki hafa þjálfað eða sýnt þá hunda sem þær gætu fengið á keppnisdag svo það er úr færri hundum að velja á æfingar en að öðru leyti er undirbúningurinn eins og fyrri ár.
Hvernig leggst verkefnið í þig?
Þetta leggst mjög vel í mig og það eru algjör forréttindi að fá að taka þátt í að þjálfa þessar stelpur sem gera alltaf sitt besta og eru alltaf tilbúnar að leggja inn vinnu til þess að verða betri. 
Sturluðu staðreynd um þig sjálfa?
Kannski ekki mjög sturlað en ég borða ekki smjör.
Hvað er lífsmottóið þitt?
Mottóið mitt er að hafa gaman.

​Eyrún Eva Guðjónsdóttir
Nafn - Eyrún Eva Guðjónsdóttir.
Gælunafn - Mamma kallar mig oft Evu annars á ég mér ekkert gælunafn.
Aldur - 15 ára.
Stjörnumerki  - Hrútur.
Skóli -  Sunnulækjarskóli á Selfossi.
Uppáhalds drykkur? - Virgin Pina colada.
Hvað færð þú þér í bragðaref? - Hlaup perlur, jarðarber og mars.
Uppáhalds sjónvarpsþáttur? - Outer banks.
Uppáhalds tónlistarmaður? - Bubbi Morthens.
Er hundur/hundar á þínu heimili og hvaða tegund?
Já, við erum með cavalier og hann heitir Jökull.
Hvenær sýndir þú þinn fyrsta hund og hvernig hundur var það?
Ég sýndi minn fyrsta hund haustið 2018, hún er cavalier og heitir Una.
Hver er þín helsta fyrirmynd sem sýnandi?
Hilda Björk Friðriksdóttir.
Ef þú mættir eiga hvaða tegund sem er fyrir utan þá tegund sem býr á heimili þínu í dag hvaða tegund myndir þú velja og af hverju?
Ég myndi velja irish soft coated wheaten terrier eða enskan cocker spaniel því þetta eru tvær af mínum uppáhalds tegundum og þetta eru klárir hundar, rólegir en æstir á sama tíma og skemmtilegir karakterar.
Hvaða tegund hefur þú verið að sýna í keppni ungra sýnenda og hvað heillar þig mest við þá tegund?
Ég hef verið að sýna wheaten terrier ótrúlega mikið og það er bara over all uppáhalds tegundin mín, það sem heillar mig mest við þessa tegund er hvað það eru ótrúlega sterkir karakterar í tegundinni.
Hefur þú verið áður í landsliðinu eða er þetta þitt fyrsta skipti?
Já, ég var í landsliðinu í fyrra líka.
Hvernig leggst landsliðsverkefnið í þig?
Mjög vel ég er sjúklega peppuð fyrir þessu!
Nú verður keppnin haldin hér heima í ár, heldur þú að það verði eitthvað öðruvísi að keppa hér en úti og hvað þá helst?
Ég er bæði spennt og ekki. Ég er mjög spennt að sjá hvernig umgjörðin verður en er hrædd um að þetta verði svipað öðrum sýningum hérna heima.
Ertu búin að ákveða hvaða tegundir fara á óskalistann hjá þér?
Enskur cocker spaniel, wheaten terrier og schnauzer.
Sturluðu staðreynd um þig sjálfa?
Ég er svaðalega mikil brussa.
Hvað er lífsmottóið þitt?
​Aldrei gefast upp og áfram gakk.

Jóhanna Sól Ingadóttir
Nafn – Jóhanna Sól Ingadóttir.
Gælunafn – Jojo.
Aldur – 13 ára.
Stjörnumerki – Sporðdreki.
Skóli – Lækjarskóli, Hafnarfirði.
Uppáhalds drykkur? – Mountain dew.
Hvað færð þú þér í bragðaref? – Banana, oreo og smartís kurl.
Uppáhalds sjónvarpsþáttur? – Venjulegt fólk.
Uppáhalds tónlistarmaður? – Lana Del Rey.
Er hundur/hundar á þínu heimili og hvaða tegund?
Já þrír hundar, einn irish soft coated wheaten terrier og hinir tveir eru german shorthaired pointer.
Hvenær sýndir þú þinn fyrsta hund og hvernig hundur var það?
30. október 2021, og þá sýndi ég irish soft coated wheaten terrier á terrier deildarsýningu.
Hver er þín helsta fyrirmynd sem sýnandi?
Bergdís Lilja Þorsteinsdóttir.
Ef þú mættir eiga hvaða tegund sem er fyrir utan þá tegund er býr á heimili þínu í dag hvaða tegund myndir þú velja og af hverju?
White swiss shepherd, því að mér finnst þeir mjög skemmtilegir.
Hvaða tegund hefur þú verið að sýna í keppni ungra sýnenda og hvað heillar þig mest við þá tegund?
Hef verið mest með white swiss shepherd og irish soft coated wheaten terrier, mér finnst það skemmtilegar tegundir og töffarar sem er gaman að.
Hefur þú verið áður í landsliðinu eða er þetta þitt fyrsta skipti?
Þetta er mitt fyrsta skipti.
Hvernig leggst landsliðsverkefnið í þig?
Mjög vel.
Nú verður keppnin haldin hér heima í ár, heldur þú að það verði eitthvað öðruvísi að keppa hér en úti og hvað þá helst?
Ég hef ekki keppt áður í landsliðinu svo að ég hef ekkert viðmið.
Ertu búin að ákveða hvaða tegundir fara á óskalistann hjá þér?
Jebbs, ég er búin að ákveða.
Sturluðu staðreynd um þig sjálfa?
Ég er oftast í ósamstæðum sokkum.
Hvað er lífsmottóið þitt?
Aldrei gefast upp á draumunum þínum.
 

Nafn -  Hrönn Valgeirsdóttir.
Gælunafn - Hransína.
Aldur  - 17 ára.
Stjörnumerki - Steingeit.
Skóli - VÍVA Verzlóó.
Uppáhalds drykkur? - Vatnnn.
Hvað færð þú þér í bragðaref? - Nútella, jarðarber og kökudeig.
Uppáhalds sjónvarpsþáttur? - Money heist.
Uppáhalds tónlistarmaður? - Beyoncé og Rihanna!!.
Er hundur/hundar á þínu heimili og hvaða tegund?
Já ég á Bichon Frise.
Hvenær sýndir þú þinn fyrsta hund og hvernig hundur var það?
Ég sýndi hund í dóm um leið og ég gat, sem var 13 ára. Ég man samt ekki alveg hvaða hund ég sýndi.
Hver er þín helsta fyrirmynd sem sýnandi?
Frænka mín, Þorbjörg Ásta.
Ef þú mættir eiga hvaða tegund sem er fyrir utan þá tegund sem býr á heimili þínu í dag hvaða tegund myndir þú velja og af hverju?
Ég er ekki viss… allaveganna ekki lítinn!
Hvaða tegund hefur þú verið að sýna í keppni ungra sýnenda og hvað heillar þig mest við þá tegund?
Ég hef verið að keppa með pudelpointer sem heitir Erik. Það er í raun ekkert sem heillar mig beint við tegundina sjálfa, ég hef bara mjög gaman af „pointer týpunni“. Megin ástæðan af hverju ég hef samt haldið mig við tegundina svona lengi er að ég fann svo frábæran hund.
Hefur þú verið áður í landsliðinu eða er þetta þitt fyrsta skipti?
Þetta er fjórða skiptið mitt í landsliðinu.
Hvernig leggst landsliðsverkefnið í þig?
Mjög vel!! Geggjaður liðsandi og allir mjög spenntir yfir þessu.
Nú verður keppnin haldin hér heima í ár, heldur þú að það verði eitthvað öðruvísi að keppa hér en úti og hvað þá helst?
​Já ég held að þetta verði svolítið önnur upplifun. Fyrir íslenska liðið verður helsti munurinn auðvitað utanlandsferðin en fyrir hin liðin verður stærð sýningarinnar líklegast ólík því sem þau eru vön. Ég held að keppnin sjálf muni heppnast ótrúlega vel og mér finnst ég mjög heppin að fá að upplifa hana haldna í fyrsta skipti hér á Íslandi.
Ertu búin að ákveða hvaða tegundir fara á óskalistann hjá þér?
Ég setti german shorthaired pointer í fyrsta val, austarlian shepherd í annað og flatcoaded retriver í þriðja.
Sturluðu staðreynd um þig sjálfa?
Ég bjó í Skotlandi í tvö og hálft ár.
Hvað er lífsmottóið þitt?
Á hundasýningum er það allaveganna “fake it till you make it”.

​Nafn - Freyja Guðmundsdóttir.
Gælunafn - Freyja.
Aldur - 17 ára.
Stjörnumerki - Ljón.
Skóli - FG (Fjölbrautaskólinn í Garðabæ).
Uppáhalds drykkur - Grænt vithit.
Hvað færð þú þér í bragðaref? - Jarðarber, oreo og toblerone.
Uppáhalds sjónvarpsþáttur - Euphoria.
Uppáhalds tónlistarmaður - Bríet.
Er hundur/hundar á þínu heimili og hvaða tegund?
Já, ég er með einn hund sem heitir Kátur. Hann er Bichon frisé.
Hvenær sýndir þú þinn fyrsta hund og hvernig hundur var það?
Fyrsti hundurinn sem ég sýndi var bichon frisé, á degi ungmennadeildar HRFÍ þegar ég var 8 ára.
Hver er þín helsta fyrirmynd sem sýnandi?
Frænka mín, Auður Sif Sigurgeirsdóttir.
Ef þú mættir eiga hvaða tegund sem er fyrir utan þá tegund er býr á heimili þínu í dag hvaða tegund myndir þú velja og af hverju?
Afghan hound, ég hef alltaf verið hrifin af tegundinni.
Hvaða tegund hefur þú verið að sýna í keppni ungra sýnenda og hvað heillar þig mest við þá tegund?
Ég hef sýnt margar tegundir í ungum sýnendum og allar tegundir heilla mig og sinn hátt.
Hefur þú verið áður í landsliðinu eða er þetta þitt fyrsta skipti?
Ég hef verið áður. 2020, 2021, 2022 og svo núna í ár.
Hvernig leggst landsliðsverkefnið í þig?
Mér finnst alltaf gaman og spennandi að fá að vera landsliðsfulltrúi Íslands í ungum sýnendum.
Nú verður keppnin haldin hér heima í ár, heldur þú að það verði eitthvað öðruvísi að keppa hér en úti og hvað þá helst?
Það verður gaman að fá að keppa á heimavelli og hafa stuðning margra.
Ertu búin að ákveða hvaða tegundir fara á óskalistann hjá þér?
Wheaten terrier, petit basset griffon vendéen og enskur cocker spaniel.
Sturluðu staðreynd um þig sjálfa?
Ég fótbrotnaði í karaoke.
Hvað er lífsmottóið þitt?
„Just do it“.