Kynning á frambjóðendum til stjórnar 2024

11/4/2024

Nú er komið að aðalfundi félagsins árið 2024.
Það verður kosið um tvo aðila í aðalstjórn til tveggja ára og einn varamann fyrir þá stjórnarmenn til tveggja ára. Að auki verður kosinn varamaður sitjandi aðalmanna til eins árs.
Kosning stjórnar- og varamanna fer fram með rafrænum hætti og stendur til fimmudagsins 18. Apríl 2024, kl: 18:00.

Hlekk inn á kosningar má finna á forsíðu www.hrfi.is
Fundarboð á vef HRFÍ.

Í framboði eru:
Aðalstjórn til tveggja ára:

Anna Guðjónsdóttir
Anna Þórunn Björnsdóttir
Sigurður Valdimar Steinþórsson
Sunna Birna Helgadóttir

Varastjórn til tveggja ára:

Elín Edda Alexandersdóttir
Sigurður Valdimar Steinþórsson

Varastjórn til eins árs:

Anna Vigdís Gísladóttir
Klara Símonardóttir
Sigurður Valdimar Steinþórsson

Anna Guðjónsdóttir
Bíður sig fram í aðalstjórn til tveggja ára.

Kæru félagsmenn HRFÍ
Anna Guðjónsdóttir heiti ég og hef setið í stjórn Hundaræktarfélags Íslands síðastliðin 4 ár, fyrst sem varamaður til tveggja ára og svo sem meðstjórnandi í aðalstjórn síðustu tvö ár. Ég hef ákveðið að gefa kost á mér til áframhaldandi stjórnarsetu í aðalstjórn félagsins. Síðustu fjögur ár í stjórn hafa verið áhugaverð og hefur stjórn komið að mörgum málum er varða velferð okkar besta vinar en þó eru ýmis mál sem þurfa frekari úrvinnslu og langar mig því að starfa áfram á þágu félagsins okkar.

Ég bý í dag í Borgarnesi ásamt hundunum mínum sem eru af tegundunum Chihuahua og Lhasa Apso og snýst hinn venjulegi dagur að stórum hluta um hundalífið. Ég hef verið dugleg að sækja sýningar félagsins ásamt hundunum mínum en einnig hef ég æft rally-hlýðni sem mér finnst mjög áhugaverð og skemmtilega leið í þjálfun. Chihuahua hefur verið mín tegund síðan árið 2006 og hlotnaðist mér sá heiður árið 2019 að verða einn af þremur meðræktendum af Himnaræktun sem hefur mátt fagna góðu gengi í gegnum tíðina. Ég er sjúkraþjálfari að mennt og var ég þeirrar gæfu njótandi að þegar ég hóf nám í Finnlandi kynntist ég mikið af virktum ræktendum og gáfu þau 10 ár sem ég bjó í Finnlandi mér mikla visku til þess að kynnast sýningum, ræktun og hinum ýmsu hlutum sem koma að félagsstarfi og öðru slíku.

Síðustu þrjú ár hef ég setið í sýningastjórn félagsins og síðan 2024 hef ég setið sem Formaður sýningastjórnar, samhliða sæti mínu í stjórn félagsins. Ég hef mikinn áhuga á sýningum félagsins ásamt því að bæta enn betur fræðslu til félagsmanna í hinum ýmsu málefnum er viðkoma ræktun. Á þessi sviði nýtist sjúkraþjálfamenntin mér vel þar sem ég hef góða reynslu af mannlegum samskiptum og mikla reynslu af teymisvinnu. Ég er jákvæð að eðlisfari og brenn fyrir félagið okkar allra, ég veit að verkefni stjórnar eru fjölbreytt og því langar mig að halda áfram að leggja mitt að mörkum að gera gott félag ennþá betra.

Anna Þórunn Björnsdóttir
Bíður sig fram í aðalstjórn til tveggja ára.

Kæru félagsmenn HRFÍ.
Ég heiti Anna Þórunn Björnsdóttir og hef ákveðið að bjóða fram krafta mína í aðalstjórn HRFÍ á næsta aðalfundi félagsins.

Ég hef starfað síðustu 23 ár á Fjármálasvið hjá verkfræðistofunni Mannvit og gegnt hlutverki fjármálastjóra síðan 2018 auk þess að sitja í stjórn Mannvit frá 2012-2018. Á síðasta ári var Mannvit keypt af COWI sem er alþjóðlegt fyrirtækið með 8000 starfsmenn. Ég hef því síðastliðið ár unnið við að færa félagið yfir í alþjóðlegt umhverfi og innleiða ný kerfi og ferla.

Ég hef verið viðloðin hundaheiminn og HRFÍ í 20 ár, en árið 2004 eignaðist fjölskyldan sinn fyrsta ættbókafærða hund af tegundinni þýskur fjárhundur. Síðan þá hafa 4 slíkir verið hluti af fjölskyldunni.

Árið 2007 byrjaði ég að þjálfa hund með Björgunarhundasveit Íslands, ásamt því að byrja í nýliðastarfi hjá Hjálparsveit skáta í Garðabæ. Minn fyrsti leitarhundur hét Urður og kláraði hún útkallsréttindi bæði í víðavangsleit og snjóflóðaleit. Ég stafaði með báðum þessum sveitum til 2015.

Árið 2015 fluttum ég og meðræktandi minn inn hunda af tegundinni hvítur svissneskur fjárhundur (White Swiss Shepherd). Fyrsta hvíta gotið fæddist þann 17. júní 2016 og eru gotin nú orðin 12 talsins undir ræktunarnafninu Gunnarsholts. Í gegnum tíðina höfum við ræktað og/eða átt yfir 30 sýninga-og/eða vinnumeistara og flutt inn 15 hunda til ræktunar.

Ég tel framtíð félagsins vera bjarta og gott skref tekið með kaupum á hentugra húsnæði, sem eykur möguleika á öflugra félagstarfi með aðstöðu fyrir æfingar, minni sýningar og aðrar uppákomur. Sem áhugamanneskja um hundaræktun, þjálfun og vinnu með hundum, sé ég tækifæri á að gera góða hundamenningu sýnilegri í samfélaginu og efla fræðslu til ræktenda og almennra hundaeiganda. Við þurfum líka að vera dugleg við að nýta okkur tæknina sem gefur félagsmönnum meiri möguleika á að taka þátt óháð búsetu. Þá vona ég að þekking mín á fjármálastjórn geti komið félaginu til góða.

Kær kveðja, Anna Þórunn

Sigurður Valdimar Steinþórsson
Bíður sig fram í aðalstjórn til tveggja, til vara í varastjórn.

Sæl öll, Sigurður Steinþórsson heiti ég og er tæplega fertugur fjölskyldufaðir búsettur í Vogunum. Ég hef starfað hjá BM Vallá í sex ár og starfa núna sem lagerstjóri þar og uni hag mínum vel. Einnig er ég formaður starfsmannafélagsins þar.

Mig langar að bjóða mig fram í stjórn HRFÍ vegna þess að ég tel mig geta orðið félaginu til mikils gagns með áhuga mínum, drifkrafti og virðingu minni fyrir hundum og velferð þeirra. Ég hef alla tíð verið mikill dýravinur og átt ófáa ferfætta vini í gegnum tíðina sem hafa auðgað mitt líf og fjölskyldu minnar. Árið 2020 bættist í fjölskylduna hjá okkur hreinræktaður boxer og höfum við mætt á og tekið þátt í öllum sýningum sem kostur hefur verið á. Nýverið sótti ég um ræktunarnafnið "Boxers of Iceland" og er mitt fyrsta got fætt. Í dag eigum við fimm hunda, þar af tvo sem eru á fóðursamning og tvo hvolpa. Ég flutti inn Boxer rakka frá Serbíu í fyrra og er ný Boxer tík væntanleg til landsins á næstu vikum og bíðum við hennar með mikilli tilhlökkun og erum spennt að bæta við stofninn á tegundinni, sem fer ört stækkandi, enda yndisleg tegund.

Fyrir utan að hafa brennandi áhuga á hundum og hundarækt hef ég mikinn áhuga á ljósmyndun, videógerð og myndvinnslu sem ég tel einnig geta nýst félaginu til góða. Ég hef fengið mikla hvatningu til að sækja um þetta verkefni sem ég tel góð meðmæli með mér sem nefndarmanni. Ég hef sterkar skoðanir, er fylginn sjálfum mér, vinn vel með öðrum og hef góða reynslu af nefndarsetu. Ég vona að ég fái tækifæri til að nýta krafta mína til góðs fyrir félagið.

Sunna Birna Helgadóttir
Bíður sig fram í aðalstjórn til tveggja ára.

Kæru félagar HRFÍ
Ég hef elskað hunda síðan að ég man eftir mér og verið í kringum þá mest alla ævi. Árið 2012 fékk ég minn fyrsta golden retriever og fljótlega eftir það byrjaði ég að hafa áhuga á ræktun og hundasýningum. Það var í febrúar 2014 sem ég fór á mína fyrstu sýningu og hef mætt á þær flest allar síðan þá. Ég hef verið að flytja inn golden retriever frá árinu 2014 og var með mitt fyrsta got árið 2015. Ræktunarnafnið mitt er Golden Magnificent og markmið mitt og einlægur áhugi er að rækta heilbrigða og fallega hunda með gott geðslag.

Undanfarin 5 ár hef ég átt sæti í stjórn Retrieverdeildarinnar og er að byrja mitt fjórða ár sem formaður deildarinnar. Á sama tíma hef ég einnig verið í sýninganefnd Retreiverdeildarinnar þar sem við höfum skipulagt hin ýmsu námskeið og tvær deildarsýningar á ári. Verkefnin eru mörg og fjölbreytt og það hefur verið ánægjulegt að starfa í stjórn.

Hjá Hundaræktarfélagi Íslands hef ég sinnt hinum ýmsu störfum. Ég var nokkur ár í ritnefnd Sáms en hef einnig verið í sýninganefnd og starfað á sýningum sem ritari. Það sem mér hefur fundist skemmtilegast við þetta starf er hversu mörgu góðu fólki ég hef kynnst sem allt deilir jafn miklum áhuga á hundum og hundarækt.

Hundar og allt sem þeim tengist hefur verið mitt helsta áhugamál undanfarin ár. Ræktun og sýningar hafa verið stór þáttur í starfi mínu með hundana en einnig hef ég farið á hin ýmsu hundanámskeið. Ég lærði hundaþjálfun á árunum 2018-2019 og er útskrifuð sem hundaþjálfari frá Heiðrúnu Villu en núna nýlega lauk ég hundasnyrtinámi hjá London School of Grooming.

Ég er mjög áhugasöm um að starfa fyrir félagið okkar og vil leggja mig fram við að bæta hag okkar sem ræktenda og hundaeigenda.
Með góðri kveðju, Sunna Birna Helgadóttir

Elín Edda Alexandersdóttir
Bíður sig fram í varastjórn til tveggja ára.

Kæru félagsmenn
Elín Edda Alexandersdóttir heiti ég og er fertug, þriggja barna móðir. Ég hef mikinn áhuga á öllu sem við kemur hundum enda eigum við fjölskyldan þrjá hunda, tvo af tegundinni Vorsteh og einn af tegundinni Wheaten terrier.

Undanfarin ár hef ég verið dugleg að kynna mér starfsemi Hundaræktarfélags Íslands enda er félagið okkar stórt og hefur upp á margt að bjóða. Þá höfum við fjölskyldan nýtt Vorsteh hundana okkar tvo í veiðar ásamt því að sækja alskyns hlýðni vinnu eins og t.d. Rallý. Þá hef ég verið dugleg að sækja sýningar félagsins og aðstoða með hin ýmsu störf sem viðkoma þeim hvort sem það sé innan hrings eða utan.

Yngsta barnið okkar hefur mikið tekið þátt í ungum sýnendum og hlotnaðist mér sá heiður að vera tilnefnd í Æskulýðsnefnd fyrir ári síðan, sem fer fyrir öflugu barnastarfi innan félagsins okkar og hefur mikið áorkast í gegnum árin enda tel ég það mikilvægt að hlúa vel að komandi kynslóð því þau eru jú framtíðin. Ásamt því að sitja í Æskulýðsnefnd sit ég einnig í stjórn Terrier deildar HRFÍ.

Í dag starfa ég hjá Hringrás við reikningagerð og innheimtur og hef af því starfi mikla reynslu. Ég hef góða færni í mannlegum samskiptum og vinn vel í teymi. Félagið er mér mjög kært og trúi ég því að enn fleira sé hægt að gera til að stuðla að góðri hundamenningu á Íslandi. Því langar mig að gefa kost á mér til varastjórnar HRFÍ og mun ég vinna vel í þágu félagsins fái ég ykkar traust til setu í varastjórn.
Elín Edda Alexandersdóttir

Anna Vigdís Gísladóttir
Bíður sig fram í varastjórn til eins árs.

Kæru félagsmenn HRFÍ, Ég hef ákveðið að gefa kost á mér til varastjórnar HRFÍ til eins árs.
Ég fékk minn fyrsta hund 4 ára gömul og hef því nánast allt mitt líf verið nálægt hundum með örstuttum hléum. Minn fyrsta hreinræktaða hund fékk ég árið 2012 þegar ég eignaðist Border terrier tíkina Míu litlu.

Mín fyrstu kynni af Hundaræktarfélaginu voru fyrir rúmlega 25 árum þegar ég stundaði hundafimi hjá Íþróttadeild félagsins með Rough collie hundinum mínum, Káti Gísla. Við Kátur tókum þátt í ýmsum uppákomum deildarinnar, komum m.a. fram í Hljómskálagarðinum á 17. júní að sýna hundafimi. Mía litla og ég stunduðum einnig hundafimi, ásamt því að æfa hlýðni og taka þátt í hlýðniprófum og náði Mía þeim árangri að verða OB1.

Ég hef tekið þátt í sýningum félagsins frá 2014 þegar ég byrjaði að sýna hvolpa úr mínu fyrsta goti. Einnig fylgdi ég ungri frænku um tíma í unga sýnendur og mætti á alla viðburði hjá þeim.
Ég hef óbilandi áhuga á allri hundaþjálfun og er mjög virk í að æfa hlýðni, rallýhlýðni og fleira með hundunum mínum.

Mér finnst mikilvægt að Hundaræktarfélagið sé leiðandi í öllu starfi sem snýr að hundum. Fræðsla innan félags og utan, hagsmunir okkar hundaeigenda, heilsa og velferð hunda eiga að vera í fyrirrúmi hjá félaginu.

Ég hef starfað sem framleiðandi í Kvikmynda- og sjónvarpsframleiðslu í rúmlega 30 ár. Í mínu starfi skiptir skipulagning og sveigjanleiki öllu máli ásamt því að vinna vel með öðrum. Tel ég mig því vel til þess fallna að takast á við krefjandi verkefni sem þarfnast úrlausnar ásamt því að starfa með góðum hópi fólks. Ég tel að ég geti orðið félaginu okkar góður liðsstyrkur og geti stutt við stjórn félagsins og komið að málum sem ýta þarf úr vör og fylgja eftir.
Ég óska því eftir ykkar stuðningi í sæti varastjórnar til eins árs. Með vinsemd, Anna Vigdís Gísladóttir

Klara Símonardóttir
Bíður sig fram í varastjórn til eins árs.

Til félagsmanna HRFÍ
Ég heiti Klara Símonardóttir og gef kost á mér sem varamaður í stjórn Hundaræktarfélagsins. Ég hef lokið námi í viðskiptafræði frá Háskólanum á Bifröst og stunda MBA nám (Masters in Business Administration) við Háskólann í Reykjavík. Einnig hef ég lokið námskeiði fyrir viðurkennda stjórnarmenn frá Akademias (Corporate Governance) og úrvali stjórnunarnámskeiða hjá Harvard Business Review og Stanford Online.

Síðustu ár starfaði ég sem framkvæmdastjóri Petmark ehf. þar sem ég gegndi áður stöðu markaðsstjóra og þar áður vörumerkjastjóra. Áður en ég hóf störf hjá Petmark var ég í 7 ár starfsmaður á skrifstofu Hundaræktarfélag Íslands þar sem ég öðlaðist mikla þekkingu á starfsemi félagsins. Ég hef einnig gegnt ýmsum sjálfboðastörfum í deildum og nefndum félagsins svo sem í stjórn Chihuahuadeilar og í vísindanefnd. Einnig hef ég ritstýrt tímariti félagsins Sámi sem og tímaritinu Dýrin mín. Fyrsta hundinn minn eignaðist ég árið 2001, Chihuahua hundinn Spotta en fyrsta gotið mitt fæddist árið 2006 undir ræktunarnafninu Hrímnis. Ég hef verið virkur ræktandi síðan þá en þó með fá got á ári en ég hef gríðarlegan áhuga á ræktun og heilsufari hunda. Chihuahua hefur alltaf verið mín tegund en hef ég þó átt dvergschnauzerhunda, pomeranian og papillon en stefnan er að eignast stærri hund í náinni framtíð.

Hundaræktarfélagið á sér langa og merka sögu og hefur gríðarlegur árangur náðst í bættri hundamenningu á Íslandi og aðstöðu fyrir okkur hundaeigendur en enn eigum við nokkuð í land. Fræðsla til nýrra hundaeigenda er mér mjög hjartfólgin og tel ég félagið eiga nokkuð inni þar til að stuðla að auknum félagafjölda. Ég tel HRFÍ geta orðið enn öflugri talsmann hundaeigenda og hundaræktenda á Íslandi og vil leggja mitt af mörkum til þess.
Með kveðju,
Klara Símonardóttir.