Norðurlandakeppni (Nordic Winner) ungra sýnenda fer fram í Svíþjóð sunnudaginn 15. desember. Þar munu keppa landslið ungra sýnenda frá Noregi, Finnlandi, Danmörku og Íslandi. Landslið Íslands samanstendur af fjórum stigahæstu ungu sýnendum í eldri flokki og í ár eru það þær Eyrún Eva Guðjónsdóttir, Jóhanna Sól Ingadóttir, Kristín Ragna Finnsdóttir og Emilý Björk Kristjánsdóttir sem skipa landsliðið. Þjálfarar landsliðsins eru þær Rannveig Gauja Guðbjartsdóttir og Brynja Kristín Magnúsdóttir. Næstu daga munum við fá að kynnast þessum hæfileikaríku hundastelpum.

Dagur ungmennadeildar HRFÍ var haldinn 26. maí 2024 í húsnæði HRFÍ. Fólki frá þriggja ára aldri var boðið að taka þátt í að sýna hunda þar sem yngstu sýnendunum var velkomið að taka með sér einhvern eldri inn í hringinn sér til stuðnings. Keppt var í 6 flokkum, barnaflokkum 3-5 ára og 6-9 ára þar sem ekki var raðað í sæti og allir voru sigurvegarar, ungir sýnendur yngri flokkur 10-12 ára og eldri flokkur 13-17 ára og að lokum fullorðins flokkunum 18-34 ára og 35+.

Þessi einstaklega skemmtilegi viðburður sameinar alla aldurshópa í áhugamálinu. Hægt var að gæða sér á vöfflum og fleira góðgæti sem var til sölu til styrktar deildarinnar á meðan fylgst var með stórsnjöllum sýnendum láta ljós sitt skína. Dómarar dagsins voru þau Bergdís Lilja Þorsteinsdóttir, Freyja Guðmundsdóttir og Maríus Þorri Ólason sem eru fyrrverandi ungir sýnendur auk Jóhönnu Sól Ingadóttur sem er ungur sýnandi í eldri flokki. 

Ungmennadeild félagsins heldur utan um ungu sýnendurnar okkar sem keppa á sýningum HRFÍ. Þau börn sem lenda í sæti fá stig og börn úr eldri flokki sem ná þeim árangri að verða með fjórum stigahæstu keppendum ársins skipa landslið félagsins og er boðið að keppa fyrir Íslands hönd í ungum sýnendum á stórum sýningum í útlöndum. Það sem af er ári hafa þær Freyja Guðmundsdóttir og Hrönn Valgeirsdóttir náð stórkostlegum árangri á þeim sýningum sem þær voru fulltrúar Íslands.

​Það má með sanni segja að starfið í ungmennadeild félagsins sé blómlegt og mikið um að vera, en undanfarin misseri hafa aðstandendur ungra sýnenda haft í nógu að snúast að mæta með börnunum á námskeið, sýningaþjálfanir og aðra viðburði sem boðið hefur verið upp á hjá deildinni.
​
Hér fyrir neðan má finna nokkrar svipmyndir frá deginum en fleiri myndir má nálgast á facebook síðu ungmennadeildar og hægt er að kynna sér starfsemi deildarinnar á vefsíðu ungmennadeildar. 

Dagur Ungmennadeildar HRFÍ var haldinn hátíðlegur í níunda sinn sunnudaginn 25. september í Gæludýr.is á Korputorgi.  
Börnum á aldrinum 3-5 ára og 6-8 ára gafst tækifæri til að spreyta sig í sýningarhringnum með fjórfætta vini sína en allir þátttakendur fengu rósettur ásamt þátttökuverðlaunum frá Dýrheimum ehf. Einnig var boðið upp á hefðbundna keppni í ungum sýnendum, yngri og eldri flokki, en sýnendum á níunda aldursári var boðið að taka þátt í yngri flokki.  
Síðast en ekki síst var boðið upp á fullorðinsflokka fyrir 18-34 ára og 35 ára og eldri þar sem þátttakendur kepptu sín á milli um hver væri besti sýnandinn. Það má því með sanni segja að þetta hafi verið skemmtilegur viðburður fyrir alla fjölskylduna.  ​